Tidleg vår og frodig vegetasjon
Våren kjem svært tidleg på Seimsstranda, og det ligg vanlegvis lite snø om vinteren. Det lune, frodige og fuktige klimaet gjer at ein vårtur i området kan opplevast som ei vandring i eit kjempestort drivhus. Dei gamle slåtteteigane ligg inn mellom urene ved foten av høge berg som strekkjer seg bratt opp mot synsranda. Det vart i tidlegare tider slege oppe i fjellhyller og ute på kantane av juv der ein i dag synest det er nifst å ta seg fram. Det er både større og mindre fossefall i bekkane i området, og både Fremstegrova og Instegrova har stor vassføring vår og haust.
Innhausting
Slåttonna i Seimsstranda varde i 14 dagar, med fire menneske frå kvart bruk. Stølsjentene kom ned Stølsskora frå Seimsstølen med slåttematen, - surmjølk (skjør), kalde "komparar" og byggmjølsgraut. Asbjørn Seime har skrive:
"Dei slo nede med vatnet og langt oppe i fjellet. Alle tre bruka hadde høyløer oppe på Kvithamrane. Der slo og hesja dei graset og bar tørrhøyet inn i løene. Om vinteren rulla dei høyet ned til vatnet i meis. Meisa var eit nett laga av snøre. I Stranda var det meir å hente. Dei rispa lauv av alm til grisefôr, og hogg og kjerva lauv av rogn og selje til sauer og geiter, ofte langt oppe i fjellet. Dette fôret tok dei ned til vatnet med løypestreng."
Lasting ved berga og løypestreng
Hamnen heiter ein stad i Seimsstranda. Her la dei store båtane og færingane inn til berga for lasting av fôr og ved. To løypestrenger, begge vart oppsette kring 1895, gjekk i kvar sin retning opp frå Stranda. Strengene er framleis å sjå og festa er intakte i øvste enden, like eins låge grunnmurar etter høyløer.
Natur- og kulturlandskap
Seimsstranda er i dag mykje tilvaksen av skog, men kulturminna er likevel etter måten godt synlege. Mellom anna finn vi mange større og mindre styvingstre, eller "navar", som dei gjerna vart kalla i Breim. Almetrea er truleg mellom 150 og 300 år gamle.
