Herlandsfossen

Som ein katedral med romanske rundbogar og toskansk gotikk ligg den velbygde kraftstasjonen ved Herlandsfossen ovanfor Fotlandsvåg, omhugsamt forblenda med fuga naturstein; eit elegant eksempel på den medvitne symbolarkitekturen i industribygg på det tidlege 1900-talet. I 1919 vart stasjonen sett i drift; eit dristig og framsynt tiltak av dei tre kommunane Hamre, Haus og Hosanger. Problemfri vart ikkje drifta, reint økonomisk. Store kraftkundar som Nonåsgruvene og De Norske Saltverker på Gatland i Fotlandsvåg gjekk konkurs; det siste var eit kortvarig spekulasjonseventyr i åra 1918-23 som aldri vart røyndom: utdamping av 100 000 tonn koksalt årleg, frå sjøvatn, med elektrisk energi.