Nerheim

Tuna på dei to bruka på Store Nerheim ligg i skifte med kvarandre. Midt i grenselina ligg eldhusa, som er felleseige, som eit skilje mellom bruka. Eldhuset er eigentleg to eldhus under same tak, med inngang frå kvart tun. Slike løysingar er uvanlege i Sunnhordland etter utskiftinga, og det får oss til å spekulera litt på om slikt hopehav representerer ein byggjeskikk som går langt attende i tid. Bustadhuset, ei lemstove, har fått si noverande form i andre halvdelen av 1800-talet. Det er to tømra stover, bygde saman om kjøkken og gang. Stovene har lem og er utvida i breidda med stavbygde kammers. Løa er ei stor stavløe med tømra flor. Her står det att ein grunnmur etter eit sauefjøs. Stabbur og skykkje har museet flytta til seinare, men dei er plasserte på opphavleg stad. Tunet har ei fin firkantform, med stova mot vest. Bygningane på Nerheim har sitt gamle utstyr med innbu og reiskap frå Ølen. I den eine halvdelen av eldhuset er det plassert ei stor skipsbyggingssamling frå familien Sjovatsen, som i fleire generasjonar dreiv jaktebygging på Sandviksanden i Bjoa. Den gamle bygdevegen går gjennom tunet på Nerheim.