Derfor held snigelen på Finse helst til i sør- og vestvende skråningar inntil kalkrikt fyllittberg, der det gjerne veks vier og frodige høgstaudar. Nordrenut er ein slik stad, og dertil ein kjend forskingslokalitet. Alle snigleartane på Finse er å finna på Nordrenut.
Ein sniglegenerasjon er gjerne lenger i fjellet enn i låglandet. Arten Vitrina pellucida har ein eittårig livssyklus i låglandet, det vil seia at alle fasar, frå egg til larve og vakse individ, blir unnagjorde på eitt år. I høgfjellet er livssyklusen toårig, kanskje òg treårig somme levestader, eller i ugunstige år, med låg temperatur. Dette er ei tilpassing til kort vekstsesong og knappe livsvilkår elles, ein vanleg strategi mellom dei virvellause dyra i høgfjellet.
