På den vesle husmannsplassen sin i «Hagen» under hovudbruket på Årekol i Grimo dreiv Gunnar Anfinsen Årekol (1784–1856) med mange sysler: fruktdyrking, tobakksdyrking, kringlebaking, fyrstikkfabrikasjon, bokbinding – og rosemåling. Gunnar var helseveik og hadde truleg beintuberkulose. Prost Nils Hertzberg tok seg av han og greidde å stogga sjukdommen, men Gunnar vart vanfør og halt etter dette. Hjå Hertzberg lærte han å binda inn bøker, og dette har nok vore ei god kjelde til kunnskap. Innskrifter på skåler og kister syner at Gunnar meistra både tysk og latin.
Det var først og fremst rosemålar Gunnar var, med ein fargesterk stil på raud eller kvit botn, prega av blomebarokkens fargar og kraftige former. Mange av motiva har han nytta i friske fargar på innsida av kistelok, der han også har skrive eigaren sitt namn i runer. Vi kjenner att dei storlagde formene frå kyrkjedekoren på 1600-talet: rankar med fleirbladroser, drueklasar og ein valmuelikande, gjenomskoren blom. Særleg firbladrosa blir eit hovudmotiv på dei mange skautaskrina. Truleg har dette motivet eit symbolinnhald; eit lukkebringande motiv knytt til bryllaup og ekteskap. Gunnar Årekol har vore påverka av «skautaskrinmålarane» i Kvam, særleg Per Andersson Århus frå Steinsdalen (1757/58–1831).
