Men det gamle fellestunet på Nes finn vi ikkje lenger slik det låg. Røykstova og bualoftet frå «Oppistovo» og stabburet og eldhuset frå «Nistovo» vart flytt etter utskiftinga i 1912 til det nye friluftsmuseet som var under oppbygging ved Norsk Folkemuseum på Bygdøy.
Øvre Nes vart delt i to bruk i 1688, og dei låg i eit felles tun fram til 1912.Bygningane frå Nes er kjernen i vestlandstunet på Bygdøy og gjev vitjaren ein umiskjenneleg dåm av Vestlandet, med røykstover og kritkvit kroting på sotsvart tømmer. Jamvel om vår tid ikkje lenger har så stor sans for museal «kulturimperialisme» som flyttar hus ut or sitt opphavlege kulturlandskap, må vi vedgå at mange dyrebare delar av den norske kulturarven på denne måten har vorte redda for ettertida. Vi kjenner det gamle fellestunet på Nes gjennom Arne Bergs nøyaktige rekonstruksjon, og dette innhaldsrike tunet er framleis å sjå i landskapet. Det ligg fleire eldre bygningar att i tunet, som av dagens eigar vert stelt med stor pietet og respekt for dei historiske verdiane. Gjennom gardsturisme er Nes ein av dei gardane som ønskjer velkomen i kulturlandskapet.
